ILOILO — Gin-hostage sang drug surrender ang iya iloy kag 14-anyos nga bata nga lalaki sa Brgy. Gemat-y, Passi City mga las 8 kaina sang aga.
Apang nakapalagyo ang suspek samtang gina-negosyar sang mga pulis suno kay Police Lieutenant Charina Cepeda, Deputy Chief for Operation sang Passi City Police Station.
Ginpahayag niya nga naakig ang suspek sa iya hinablos nga ila man kasilingan.
Apang indi pa maathag ni Cepeda kon ano ang ginka-akig sang suspek nga nagresulta sang pag-hostage niya sa iya iloy kag menor-de-edad nga bata.
Wala sang may nasamaran sa insidente sang nagpalupok sang duha ka beses ang suspek pero na-recover sa lugar ang bala kag pusil.
NAG-SURRENDER
Nag-conduct sang hot pursuit operation ang kapulisan tubtob nga nag-surrender ang suspek makaligad ang pila ka oras.
Ginpanginwala ni alyas Jo nga gin-hostage niya ang iya 68-anyos nga iloy kag menor-de-edad nga bata.
Dugang pa niya nga wala siya makapalupok sang pusil.
Ginpakigbahan man ni alyas Jo nga nagpalagyo siya kag wala gilayon nag-surrender sa mga pulis tungod nagakabalaka siya sang iya nga safety.
Nagaduda si Jo nga kon mag-surrender sa otoridad base nga kastiguhon siya sang mga pulis.
Samtang, suno naman kay Police Colonel Bayani Razalan, Provincial Director sang Iloilo Police Provincial Office (IPPO), ginkabig nila nga hostage taking ang natabo tungod wala na ginpaguwa ni alyas Jo ang iya iloy kag nagpamahog nga patyon niya kon magpalapit ang mga pulis.
Sa imbestigasyon sang pulis may nala-inan sang buot si Jo sa iya nga pamilya.
Naka-custody na sa Passi Police Station si Jo. — Aksyon Angel Mae Ciudad
