ILOILO CITY — Na-monitor sang Regional Police Drug Enforcement Unit (RPDEU) ang illegal nga aktibidad sang main subject nga nadakpan sa drug bust operation sa Brgy. Tanza Baybay, City Proper kaina sang kaagahon.
Suno kay Police Major Marvin Villanueva, deputy chief sang RPDEU, naguwa ang ngalan ni alyas Alog sa mga nakaligad nga operasyon gani gin-monitor tubtob nga nakumpirmar ang engagement niya sa illegal drugs.
Nagdugay sang apat ka bulan ang monitoring sang mga pulis sa subject nga taga-Nabitasan, La Paz. Lakip sa nadakpan si alyas Bukol nga taga-Infante nga customer sang main subject.
Nagabug-at sang 200 grams ang suspected shabu nga na-recover kag nagabalor sang P1,360,000.
Ginalantaw sang mga pulis nga lunsay nagakuha sang supply sang illegal drugs ang main subject kag ang nadakpan nga delivery rider sa Huervana Street kagab-i.
Sa amo nga operasyon, na-recover ang masobra isa ka milyon nga balor sang suspected shabu. — ARI Trainee Decyrrie Diamante
