ILOILO CITY — Dakup ang 50-anyos nga residente sang Barangay Sooc, Arevalo sang nakuhaan sang pusil sa entrapment operation nga ginhimo sa lugar las-9:05 kagab-i.
Suno kay Police Major Shella Mae Sangrines, spokesperson sang Iloilo City Police Office (ICPO), nakabaton sang impormasyon ang City Intelligence Unit (CIU) halin sa kabarangay sang subject nga si alyas Totong, nga nagabaligya siya sang indi lisensiyado nga mga pusil.
Dugang ni Sangrines nga sang gin-monitor sang kapulisan ang aktibidad sang subject, natukiban nga may mga record na siya sang pagpangawat kag nagadala sang armas sa tiun nga himuon niya ini.
Nakaagi na preso sa mga kaso nga theft kag robbery ang subject pero kalabanan sa mga ginpangkawatan niya ang wala na nakapasaka sang kaso.
Nakuha sa subject ang homemade caliber 5.56 Revolver, duha ka mga bala kag P3,500 nga buy bust money.
Gina-usisa pa sang kapulisan kon diin nagakuha sang pusil nga iya ginabaligya ang subject kag kon diin pa siya nagalab-ot sa pagbaligya. — Aksyon Maria Kayla Tingzon
