ILOILO — Gin-operahan ang 25-anyos nga residente sang Barangay Pal-agon, Pavia agud makuha ang bala nga nag-igo sa ila wala nga tiil samtang nagakaon sa sulod sang ila compound kahapon, Disyembre 25.
Suno kay Liza, iloy sang biktima nga si Ace, yara siya sa sulod sang ila balay sang nakabati sang ginabanta anum ka asud-asod nga lupok.
Yara sa guwa sang ila balay si Ace, nagakaon upod sa iya mga pakaisa.
Pero nagpati si Liza nga palupok lang iya nabatian tungod nagapalupok ang ila mga kasilingan.
Sang nag-untat ang linukpanay, ginpahibalo siya sang iya hinablos nga na-igo sang bala sa tiil ang iya bata.
Nagtawag ang pamilya sa Pavia Emergency Responders (PAVERS) agud madala sa ospital ang ila himata kag nag-report sa Pavia police.
Sang ginpadulungan sang kapulisan ang lugar, naabtan nila si Dayon, 37-anyos nga manug-ihaw, nga nag-ako nga siya ang nagpinalupok sang pusil.
Suno kay Police Lieutenant Gary Tayongtong, deputy chief of police sang Pavia Municipal Police Station, naga-inom-inom si Dayon upod sa iya abyan kag iloy.
Sa pagpangusisa sang mga pulis, kada magpalupok sang palupok ang iya mga kasilingan, nagabalos man si Dayon sa pagpalupok sang pusil.
Dugang ni Tayongtong, may impormasyon man nga nagapalupok si Dayon sang pusil sa ila barangay kag ini ang una nga tion nga may na-igo.
Ginalantaw man niya nga rason ang pagbulagay ni Dayon kag iya asawa gani nagpinalupok siya.
Gin-surrender ni Dayon sa mga pulis ang iya Black Widow Mini Revolver nga may unod nga duha ka bala sang 9mm.
Wala sang nabilin nga basiyo sa cylinder sang revolver.
May na-recover naman nga slug sa atubang sang gate sang compound sang biktima.
Reckless imprudence resulting in physical injury in relation to RA 10591 ukon ang Comprehensive Firearms and Ammunition Regulation Act ang ipasaka nga kaso batok sa suspect.
