ILOILO — May leakage nga LPG tank ang ginhalinan sang sunog sa Brgy. Bolilao, Mandurriao kaina sang aga.
Ini suno kay Senior Fire Officer 1 Denmark Macoco, acting chief sang Investigation and Intelligence Unit sang Iloilo City Fire Station.
Sa pagpangusisa sang bombero, nag-ilis sang LPG tank ang tag-iya sang karinderya antes ang sunog.
Nakibot na lang ang tag-iya nga gulpi lang nag-ibwal ang kalayo kag naglapta sa light materials nga parte sang karinderya.
Gintinguhaan pa sang tag-iya nga mapalong ang kalayo pero madasig nga naglapta tubtob sa balay sa likod sang karinderya.
Duha ang napilasan sang napilitan nga maglumpat sa balay tungod wala na sang guwaaan sang gulpi nag-ibwal ang kalayo. Nagahilibiun naman ang tag-iya sang napatay ang duha niya ka ido nga wala nakahingagaw guwa sa balay.
Sa assessment sang BFP, P60,000 ang balor sang kahalitan sang sunog sa istraktura. Wala pa diri nalakip ang balor sang kahalitan sang nasunog ang backhoe sa kilid sang balay. — Aksyon Angel Mae/Farrah Mae Morano
