ILOILO — Tatlo ang patay sang nalumos ang anum ka mga menor-de-edad sa Moroboro Dam sa Dingle, Iloilo kahapon sang udto, Disyembre 30.
Nakaluwas kanday Francis, 14-anyos; Jandi, 12-anyos; kag Anjo, 13-anyos. Si Anjo gindala sa ospital tungod siya ang ulihi nga na-rescue kag madamo sang nainom nga tubig.
Naglawig sang lima ka oras ang search and rescue operations antes nakita ang lawas ni Jarel, 13-anyos; kag anum ka oras antes nakita ang lawas ni Leron, 10 ka tuig ang edad.
Pareho nga napatay kanday Jarel kag Leron samtang, kaina sang aga, nakita ang lawas ni Jimmy, 13-anyos.
Lunsay mga residente sang Brgy. Tinocuan, Dingle ang mga menor-de-edad.
Sa interview kay Francis, ginsaysay niya nga nagharagay sila nga mga mag-abyan nga magkadto sa resort sa Brgy. Licuan pero sirado gani, nagdesisyon sila nga maglagaw sa dam.
Samtang nagalakat sa dam, gintusmaw ni Leron ang iya tiil pero nakadalin-as siya. Gintabangan pa siya ni Francis pero wala niya nasarangan tungod sa mabaskog nga daludo sang tubig.
Tungod sa natabo, nagtabangay ang mag-abyan pero tanan sila gin-anod sang tubig kag nagsarurot.
Natinguhaan ni Francis nga maglangoy padulong sa pang-pang sang suba gani nakaluwas siya, samtang sunod man nga nakaluwas si Jandi. Si Anjo ang na-rescue sang mangingisda sa lugar.
Ang mga rescuers na ang nakakita sa bangkay nanday Jarel kag Leron. — Aksyon Maria Kayla Tingzon
