Nagtukod sang Special Investigation Team (SIT) ang Iloilo City Police Office (ICPO) agud imbestigaran ang pagkamatay ni Dueñas Vice Mayor Aimee Paz Lamasan.
ICPO ang naga-imbestigar sa insidente tungod natabu ini sa ila balay sa Barangay Tabuc Suba, La Paz sang Disyembre 30.
Suno kay Police Colonel Kim Legada, director sang ICPO, nasulod sa parametro nga government official si Lamasan amo nga gintukod ang SIT.
Dugang ni Legada, mahibaluan sa imbestigasyon kon accidental firing ang natabu, base sa statement nga ginpaguwa sang pamilya paagi sa legal counsel sang bise alkalde.
Sa meeting nga ginhimo sang ICPO upod ang La Paz police, ginplastar nila ang mga requests for paraffin test kag autopsy nga igahatag sa pamilya sang bise alkalde.
Wala naman naka-conduct sang imbestigasyon ang kapulisan sa balay sang bise alkalde tungod gindiretso siya sa ospital kag ang iya live-partner man ang nag-turnover sang pusil.
Sa pagpangusisa sang mga pulis sa live-in partner ni Lamasan, nagahimos ang bise alkalde sang iya mga gamit tungod makadto sa Dueñas para sa gift giving.
Ibutang na kuntani sang bise alkalde sa iya safety bag ang 9mm (Tanfoglio Pistol) sang hinali naglupok kag na-igo siya sa tiyan.
Sa impormasyon nga nakuha sang mga pulis, nagapasakop sa mga firing competitions si Lamasan rason nga may pusil siya.
Yara na sa pulis ang pusil ni Lamasan kag gin-turn over na sa forensic unit.
Naka-schedule pa kuntani kahapon para sa iya ikaduha nga operasyon si Lamasan pero napatay samtang ginabulong sa ospital. — Aksyon Maria Kayla Tingzon
