Security guard pilason sang gintiro sang kapareho nga guwardiya sa Delgado Street, City Proper

ILOILO— Pilason ang 30-anyos nga security guard sang gintiro sang 28-anyos nga kasubong man nga guwardiya sa Delgado St, City Proper subong nga aga.

Suno kay Captain Melchor Tolentino, hepe sang Police Station 1 sa City Proper, naga-duty sa motorcycle parts ang suspek nga si alyas Regie sang Tapaz, Capiz.

Biktima si alyas Ben, 30-anyos nga security guard sang wala pa mahibaluan nga establishment.

Sa initial nga impormasyon sang pulis, nagkitaay ang duha kag ginkomprontar sang biktima ang suspek tungod sang ila daan nga indi pag-intindihanay.

Nagresulta ini sa pagpukutay sang duha tubtob nabatian ang tatlo ka lupok sang pusil.

Gindala sa ospital ang biktima nga may pilas sa magtimbang nga paa.

Na-recover ang issued firearm nga 9mm pistol kag arestado ang suspek. — Aksyon Farrah Mae Morano