ILOILO CITY—Naga-isahanon ang Calle Real sa downtown sa City Proper nga judging area para sa street dancing competition sa Dinagyang Tribes Competition sa Enero 25.
Base sa una gin-anunsyo sang Iloilo Festivals Foundation, Inc., duha kuntani ang mangin judging areas para sa street dancing.
Pero gindula na ang una kuntani ipahamtang sa Luna St., La Paz tungod ginhimo na ini nga performance area.
Suno kay Prof. Eric Divinagracia, Festival Director sang Dinagyang 2026, wala ginalimitahan ang mga tribu sa pag-street dancing halin sa isa ka performance area pakadto sa isa pa ka performance area.
Pero nakadepende na sa mga tribu kon ma-street dance sila ukon indi tungod wala man sang judge sa iban nga dalan. — Aksyon Marvin Malificiar
