ILOILO — Patay ang 38-anyos nga foreman sang gintiro sang kaupod niya sa ilimnan sa Barangay Jalaud, Barotac Nuevo.

Suno kay Police Captain Jersey Besas, Officer-in-Charge sang Barotac Nuevo Municipal Police Station, magka-upod nga nag-inom ang foreman nga si alyas Samuel sang Bingawan, alyas Aris nga security guard kag taga-Iloilo City, kag alyas Triks nga security guard man kag residente sang Dumangas.

Samtang, naga-inom ang tatlo, natabo ang indi pag-intindihanay sa tunga nanday Samuel kag Aris.

Naglakat si Aris apang ginsundan ni Samuel.

Sang nakita ni Aris, naghambal siya nga “suya ko sa imo” gani naggabot si Samuel sang kutsilyo kag ginbuno si Aris.

Gingabot naman ni Aris iya pusil kag gintiro si Samuel nga nagresulta sa pagkapatay sang foreman.

Napilasan naman si Triks sang nasalabat sa pagtiro ni Aris kay Samuel.

Na-recover sa crime scene ang isa kutsilyo, pusil nga caliber 45, kag lima (4) ka mga basiyo sang nasambit nga pusil.

Padayon nga ginabulong sa ospital kanday Aris kag Triks. — Aksyon Maria Kayla Tingzon