ILOILO — Dead-on-arrival sa ospital ang 18-anyos nga driver sang motorsiklo sang nakabunggo sa naga-hazard nga pick-up sa Barangay Bayuco, Tigbauan las-10:50 kagab-i, Enero 18.
Suno kay Police Captain Alfred Mansoy, officer-in-charge sang Tigbauan Municipal Police Station, nagdulog ang driver sang pick-up nga si alyas Hector, 47-anyos, tungod may ginbakal sa tiyangge antes mapauli sa Barangay Binaliuan Mayor.
Nakibot na lang ang driver sang may naglagpok kag sang iya ginbalikid nakabunggo na ang motorsiklo nga ginadala ni alyas Bert, 18-anyos nga residente sang Barangay Dorong-an, sa likod sang iya salakyan.
Pareho nga halin sa banwa sang Tigbauan ang direksyon sang mga salakyan kag papuli na kuntani.
Wasak ang panguna sang motorsiklo samtang nagupi ang likod nga bumper sang salakyan.
Natalana nga magkitaay buwas sa police station ang driver sang pick-up kag ang pamilya sang napatay agud istoryahan ang natabo. — Aksyon Maria Kayla Tingzon
