ILOILO— Gindala sa ospital ang pulis nga natiruhan sang subject sa drug buy bust operation sa Anilao, Pavia kagab-i, Enero 22.
Suno kay Police Captain Ritz Presquito, OIC sang Pavia Municipal Police Station, antes ang insidente nag-conduct sila sang drug buy bust operation batok kay alyas Jun, residente sang Purok 3, Pavia.
Ginpabutyag ni Presquito nga kilala si Jun nga naga-engage sa illegal drug activities, nagapangawat sa Barangays Purok 3, Anilao, Pagsangaan kag Tigum.
Na-aresto man sadto si Jun sa drug buy bust operation sang Pavia police pero nagbalik sa pag-engage sa illegal nga druga.
Sang natapos na ang transaksyon kag nagpakilala nga pulis ang katransaksyon, nagdalagan si Jun kag naglab-ut sang lima ka metros gani ginlagas man sang mga pulis. Naggabot si Jun sang homemade 12 gauge shotgun, nagpalupok kag naigo ang pulis nga naga-rangkko Corporal.
Ginhingagaw dala sa ospital ang pulis nga may pilas sa tyan kag padayon nga ginabulong.
Samtang, nadakpan man ang subject kag yara na sa kustodiya sang pulis.
Na-recover ang ginabanta 70 grams sang suspected shabu nga nagabalor sang P476,000.
Lain-lain ang ginakuhaan sang supply sang subject lakip sa Iloilo City.
Ginapreparar ang kaso nga frustrated homicide, violation sa Comprehensive Firearms and Ammunition Regulation Act kag Comprehensive Dangerous Drugs Act. — Aksyon Farrah Mae Morano
