ILOILO CITY–Ibalik na sa mga karsada sa festival areas ang banderitas sa Dinagyang 2027.
Ini ang ginpabutyag ni Judgee Peña, chairman sang Iloilo Festivals Foundation, Inc. (IFFI).
Sa subong nga edisyon sang Dinagyang, ginpangita sang publiko ang mga banderitas nga naandan na sa Calle Real kag iban pa nga lokasyon sa City Proper.
Madumduman nga ginpakamalaut ang IFFI tungod wala sang banderitas sa Dinagyang 2026.
Ginpaathag ni Peña nga sa naandan, ang mga brand sponsors ang nagatakod sang banderitas, ugaling ginsuhestiyon nila sa IFFI nga indi magpahamtang sang banderitas subong nga tuig.
Agud mas mangin masadya ang Dinagyang, hingyuon ni Peña ang mga brand sponsors nga Ibalik ang mga banderitas sa Dinagyang 2027.
“Sa dason, kay amo na ang gusto sang pumuluyo, indi ta sila pagpa-intrahon sa sponsorship kon indi sila magbutang sang banderitas,” suno kay Peña. — Aksyon Marvin Malificiar
