ILOILO — Napilasan sa idalom sang ilok ang pasahero sang gintiro sang pulis makaligad nga nagpangtaya sang kutsilyo sa Iloilo International Airport kahapon, Enero 28.
Ginkilala sang mga pulis kay Roland Lañojan sang Sagay, Camiguin ang natiruhan tungod sa plane ticket nga na-recover
Suno kay Clloyd Luna, isa sa mga pasahero, nagasundanay sila ni Lañojan nga nagsaka sa boarding area sa third floor sang airport. String bag lang gid ang dala ni Lañojan.
Sang yara na sa x-ray baggage scanner pasulod sa boarding area sang airport, na-detect ang unod sang string bag gani nga ginpabuksan sa iya.
Base sa naobserbahan ni Luna, nagapamalibad si Lañojan nga buksan ang iya bag kag nagapamilit nga magsulod sa boarding area tungod masakay na sa eroplano.
Tungod sini, nagpangayo sang assistance sa airport police ang mga personnel sang paluparan.
Naabtan sang pulis nga nagapangtaya sang kutsilyo nga halin sa iya bag ang suspect gani gin-istorya siya kag gin-abisuhan nga i-surrender ang dala nga hinganiban ukon i-check in na lang.
Pero nagpakatig-a ang pasahero. Una niya nga ginsaruso ang mga pulis tubtob nga natiruhan.
GINKAKAS ANG INITIAL SCREENING SA AIRPORT
Sa x-ray baggage scanner na sa third floor sang Iloilo International Airport na-detect ang kutsilyo sa sulod sang string bag sang pasahero nga gintiro sang pulis kahapon.
Kon sadto antes magsulod sa airport, maagi sa xray baggage scanner ang bag kag luggage agud makita ang unod sini.
Pero sang Oktubre 2025, ginkakas sang Civil Aviation Authority of the Philippines ukon CAAP – Iloilo ang initial screening sa Iloilo International Airport.
Ini bilang pagsunod sa inisyatibo ni Department of Transporation Secretary Giovanni Lopez nga pahapuson ang proseso sa mga pasahero..// Sa nagakatabo subong, kinahanglan lang nga magpresentar sang plane ticket kag ID agud makasulod sa airport.
Ang mga indi ma-check in nga bagahe, gina-check na lang sa xray baggage scanner antes magsulod sa boarding area sa third floor sang airport.
Gindala sa Western Visayas Sanitarium and General Hospital si Lañojan pero ginsaylo sa Western Visayas Medical Center. — Aksyon Angel Mae Ciudad/Maria Kayla Tingzon
