ILOILO — Dead-on-arrival sa ospital ang bana samtang padayon nga ginabulong sa ospital ang iya asawa sang gintiro sa Barangay Sto. Rosario, Ajuy las-9:48 kaina sang aga.
Biktima ang mag-asawa nga alyas Ben 64-anyos kag alyas Clara, 59-anyos nga caretakers sang punongan sa amo nga lugar.
Suno kay Police Captain Aileen Lacrite, officer-in-charge sang Ajuy Municipal Police Station, nagsulod ang suspetsado sa compound sa diin napahamtang ang punongan kag gin-istorya ang mag-asawa may kaangtanan sa ila madugay na nga utang nga bubod.
Nabati-an ini sang paryente sang mag-asawa, nga didto naga-istar sa compound kag sa tunga sang istoryahanay gulpi lang naggabot sang pusil ang suspect kag gintiro ang mag-asawa.
Na-igo sa likod sang ulo ang bana samtang sa may apat ka igo sa kamot kag tiil ang asawa.
May person of interest na ang kapulisan pero nagpamalibad si Lacrite sa paghatag sang impormasyon tungod padayon ang ila hot pursuit operation. — Aksyon Maria Kayla Tingzon
