13 ka pasahero, 4 ka crew na-rescue sang nalusbot ang tourist boat sa baybayon sang Carles

ILOILO— Yara na sa hilway nga kahimtangan ang 13 ka pasahero kag apat ka crew sang tourist boat nga nalusbot kahapon sa kadagatan sang Carles.

Suno kay Ensign El John Ga, spokesperson sang Coast Guard Iloilo Station, halin sa Bancal Port ang sakayan kag padulong kuntani sa Isla Gigantes sang naabutan sang pugada sa tunga sang lawod.

Tungod sini, nalusbot ang sakayan kag nagsulod ang tubig dagat.

Gilayon nga nagpangayo sang bulig ang crew sa ila kaupdanan sa port nga amo ang nagtawag sa Coast Guard Substation sa Carles.

Halos halin sa Luzon ang mga turista nga ma-island hopping lang kuntani.

Safe na ang mga sakay sang tourist boat. — Aksyon Farrah Mae Morano