ILOILO CITY — Nakaguwa na sa ospital ang driver sang truck nga ginbuno sang iya pahinante samtang naga-inom-inom sa West Habog-Habog, Molo mga las-10:30 kagab-i.
Involved sa insidente ang driver nga si Raymond kag iya pahinante nga si Jan-jan nga upod sa ila ginadayunan nga kwarto kag lunsay mga pangayaw.
Suno kay Police Captain Ryan Christ Inot, officer-in-charge sang Molo Police Station, madamo na sang na-inom ang duha sang nag-ako si Jan-jan nga nahibaluan niya nga samtang yara sila sa kwarto sang nagliligad nga inadlaw, ginalingling sila ni Raymond.
Nagbaisay pa ang duha tubtob nagkuha sang kutsilyo si Jan-jan kag ginbuno si Raymond sa wala nga butkon.
Nagkadto si Raymond sa opisina sang ila gina-ubrahan agud magpangayo sang bulig kag gindala siya sa ospital.
Nagpalagyo naman si Jan-jan pero nabilin ang kutsilyo nga iya gingamit.
Ginapreparar na ang kaso nga frustrated homicide batok kay Jan-jan samtang ginahulat ang desisyon ni Raymond kon mapasaka sang kaso. — Aksyon Maria Kayla Tingzon
