1 patay sang nasunog ang talyer sa Balabago, Jaro

ILOILO CITY— Patay sa sunog ang 24-anyos nga Criminology student sang nasunog ang talyer sa Barangay Balabago, Jaro kaina sang kaagahon.

Ginapanag-iyahan sang pamilya Ancieta ang talyer nga nasunog kag ila nga bata ang napatay.

Suno sa tag-iya nga si Lito, ginpapuli niya sa Iloilo ang bata nga si Rustom, 24-anyos halin sa Antique tungod may ulubrahon sila kuntani.

Kahapon, wala sang ideya si Lito nga nakapauli na ang iya nga bata kag yara sa talyer.

Sa impormasyon ni Lito, nagakatulog ang biktima sang natabo ang insidente. Nagtinguha pa nga makaguwa sa talyer pero posible nga nabunggo kag natumba ukon napuot sa aso.

Gina-imbestigaran pa sang BFP ang insidente. — Aksyon Kikik Enar