ILOILO CITY — Patay ang 22-anyos nga nagatambay sa tiyangge sang gintiro sa Project 1, Brgy. Sooc, Arevalo las-12:42 kaina sang kaagahon.

Suno kay Captain Michael Tuburan, hepe sang Arevalo Police Station, biktima si Mark Anthony, 22-anyos samtang suspek si alyas Samson, 42-anyos.

Sa imbestigasyon, nagkitaay ang duha sa tiyangge kag gintiro sang suspek ang biktima. Ginahibalo pa sang pulis kon nagbaisay ang duha antes ang pagpangtiro.

Pareho nga naka-inom ang duha, suno sa pulis.

Gindala pa sa ospital ang biktima nga may pilas sa wala nga ilok pero gindeklarar nga dead-on-arrival.

Nadakpan ang suspek pero wala na na-recover ang pusil nga gingamit sa pagpangtiro.

Na-recover ang isa ka empty shell kag isa ka fired cartridge sang .45 nga pusil.