ILOILO — Gin-surrender sa Sara Municipal Police Station ang loose firearm kag mga bala kaina sang aga.
Si Barangay Aspera, Sara Kagawad Vicente Dinicolas Padios ang nagdul-ong sa police station sang M203 Grenade Launcher kag 25 ka bala sang 40mm High Explosive Grenade Launcher.
Sa impormasyon, gintugyan sang concerned constituent sa barangay official ang pusil kag mga bala para i-surrender sa pulis.
Iga-endorse sang Sara police sa Explosive Ordnance Disposal (EOD) Unit para sa proper inspection, technical evaluation, kag safekeeping ang pusil kag mga bala.
Resulta ini suno kay Captain Theodore Roosevelt Saboy, hepe sang Sara Municipal Police Station, sang padayon nga police-community partnership kag sustained implementation sang PNP kontra loose firearms. — Aksyon Farrah Mae Morano
