ILOILO — May daku nga pilas sa liug ang construction worker nga nasapwan patay sa Barangay Balabago, Alimodian las-7:30 kaina sang aga.
Suno kay Police Captain Chrysler John Ledesma, officer-in-charge sang Alimodian Municipal Police Station, nasapwan sang iya upod sa trabaho si alyas Vin, 48-anyos nga taga-Sinamay, Alimodian nga nagahigda sa kilid sang iya payag malapit sa iya gina-ubrahan, kag may daku nga pilas sa liug.
Sa pagpangusisa sa asawa sang nasapwan, may ginasuprer nga nervous breakdown ang iya nga bana.
Naglisensiya si Vin sa iya asawa nga didto siya matulog sa iya payag kag indi magpauli.
May nakita nga espading malapit sa bangkay.
Ginahulat ang pag-abot sang SOCO agud maproseso ang bangkay kag lugar. — Aksyon Maria Kayla Tingzon
