ILOILO CITY – Pila ka scenarios ang ginapanan-aw nga matabo sang Western Visayas Transport Cooperative (WVTC) pananglitan magpatuman sang bigtime price increase sa gatong tungod sa nagapadayon nga giyera sang US-Israel batuk sa Iran.
Suno kay WVTC President Raymundo Parcon, mapilitan sila nga maghingyu sa Land Transportation Franchising and Regulatory Board (LTFRB) nga magpasaka sang pamasahe kon magtimbuok ang presyo sang gatong.
Ginakonsiderar sang WVTC nga halin sa P15, pasakaan sa P20 ang minimum nga pamasahe sa modernized jeepneys. Samtang, halin sa P13, himuon nga P17 ang minimum nga pamasahe sa traditional jeepneys.
Ano ang matabo kon indi pag-aprubahan ang provisional fare increase?
May posibilidad nga mag-untat sa pagbiyahe ang 30% tubtob 50% sang mga units sang WVTC kon tuman ang pagmahal sang presyo sang gatong kag indi ma-aprubahan sang LTFRB ang hingyu nila nga pagpasaka sa pamasahe.
“Kon indi nila pag-i-approve may tendency nga ma-untat kami sa pagbiyahe gid kay ngaa mapiyerde kami kay may ara kami sang amortization sa bangko nga ginabayaran, may mga drivers kag empleyado nga ginasuwelduhan kada semana. Kon inkaso nga indi namon mabawi sa amon nga operation, may tendency gid nga either buhinan namon ang mabiyahe kada adlaw, himuon namon 30% ukon 50%,” suno kay Parcon.
Nagpanawagan man siya nga kuntani magtupa gilayon ang ayuda halin sa gobyerno pareho sang fuel subsidy kag dapat mangin sige-sige agud indi magpatuman sang mahal nga saka sa pletehan.
Magluwas diri, nagpanawagan man si Parcon sa gobyerno nga temporaryo nga suspenderon ang pagsukot sang excise tax sa petroleum products agud mahagan-hagan ang pag-antos ilabe na sang transport sector.
Ginapanan-aw ang bigtime price hike sa presyo sang gatong sa pungsod nga isa sa mga epekto sang giyera sa Middle East.
