3 ka tuig nga bata patay sang na-trap sa balay nga nasunog sa Cabubugan, Guimbal

ILOILO— Wala nakahingagaw guwa sa nagakasunog nga balay ang tatlo ka tuig nga bata nga babaye sa Brgy. Cabubugan, Guimbal subong nga hapon.

Suno kay Punong Barangay Jefrey Bade, nagakatulog ang bata sa iya nga kwarto kag naglakat ang iya nga iloy.

Nagapaligo naman ang pakaisa sang bata kag sang nagguwa sa banyo, nagakalayo na ang balay.

Nakabaton sang impormasyon ang Guimbal BFP la-1:58 sa hapon gani dali-dali ginrespondihan sang mga bombero kag mga responders.

Totally gutted ang balay nga two-storey, samtang partially damaged ang balay sa kilid.

Gina-imbestigaran sang mga bombero ang ginhalinan sang kalayo. — Aksyon Farrah Mae Morano