Job hire sang LGU patay sang nabun-an sa Passi City; suspek wala pa makilal-an

ILOILO— Dead-on-arrival sa ospital ang job hire sang Passi City LGU sang nabun-an sa Brgy. Maasin, Passi City kagab-i, Marso 19.

Suno kay Major Marvin Buenavista sang Passi City Police Station, las-8:10 sa gab-i sang nakita sang residente nga may nagapangayo sang bulig nga duguon.

Natukiban nga si alyas Mike, residente sang Brgy. Gemat-y, Passi City ang nagapangayo sang bulig. Nagatrabaho nga job hire sang Passi City LGU ang biktima.

Ginahibalo pa sang pulis kon ano ang natabo sa biktima tungod wala pa sang may naghatag sa ila sang impormasyon sa natabo.

Gindala pa sa ospital ang biktima pero gindeklarar nga napatay tungod sang pilas sa ulo.

Nagbisita lang sa Brgy. Maasin ang biktima, suno sa pulis.

May lead naman ang pulis sa insidente pero indi pa mabuyagyag. — Aksyon Farrah Mae Morano