Mangunguma sa Janiuay ginlabu sang hubog nga iya ginkadlawan sang nakasandad

ILOILO — Napilasan sa wala nga guya ang mangunguma sang ginlabu sang hubog nga lalaki sa Barangay Canawili, Janiuay las-4:30 kahapon sang hapon.

Suno kay Police Captain Marlon Perez, officer-in-charge sang Janiuay Municipal Police Station, nagapahunay-hunay sa duyan ang biktima nga si alyas Ric sang gulpi ginlabu sang suspect nga si alyas Dodoy.

Sa pagpangusisa sang mga pulis sa upod inom ni Dodoy nga si alyas Tan-tan, ginpahayag sang suspect nga ginlabu niya si Ric tungod ginkadlawan siya sang nakasandad.

Indi naman ini matuod suno kay Tan-tan tungod nagapiyong-piyong na si Ric sang naglabay sila.

Ginapanan-aw man ni Tan-tan nga ang mga tawo sa palibot ang nagkadlaw kag si Ric ang napa-ukpan ni Dodoy tungod siya ang malapit.

Estable na ang kondisyon ni Ric sa ospital samtang at-large si Dodoy dala ang iya binangon. — Aksyon Maria Kayla Tingzon