ILOILO— Totally burned ang 38-anyos nga lalaki samtang tatlo pa ang pilason sang ginsunog ang balay sa Barangay Barasalon, Janiuay.
Base sa imbestigasyon sang Janiuay police, pasado las-11 sang gab-i, Abril 2, nag-abot sa ila balay ang suspek nga si alyas Remos, 31-anyos nga naka-inom.
Tungod nga naka-inom na ang suspek may mga ginhimo siya nga indi maayo rason nga ginsaway sang iya magulang nga si alyas Ritchard, 39-anyos.
Apang wala nagpamati ang suspek tubtob nga nag-inaway sila ni Ritchard.
Ginsaway sang iya magulang nga si alyas Ivy kag sang iya iloy nga si alyas Cecilia ang suspek apang wala nagpamati.
Ginkuha ni Remos ang 20-liter nga gallon nga may unod nga gasolina kag ginbubo sa sulod sang ila balay kag iya ginsindihan.
Gilayon nga nagpalagyo si Remos kag nabilin sa ila balay ang iya bayaw nga si alyas Wilgie nga amo ang napatay, asawa ni Wilgie nga utod sang suspek nga si alyas Shiela, kag mga magulang nga Ivy kag Ritchard nga lunsay pilason.
Wala pa nadakpan ang suspek suno sa pulis. — Aksyon Angel Mae Ciudad
