ILOILO — Dead-on-arrival sa ospital ang tanod sang Barangay Poblacion, Calinog sang ginbuno sa Barangay Ipil, las-10:30 kagab-i kadungan sang ila kapiyestahan.
Suno kay Police Major Myles Dieron, hepe sang Calinog Municipal Police Station, naghangkatanay ang suspect nga si alyas Nonoy, residente sang Barangay Ipil, kag ang tanod nga si alyas Boy antes nabun-an ang biktima.
Nabun-an man sa insidente ang tatlo ka mga paryente sang tanod nga nagapabilin pa sa ospital.
Sa pagpangusisa sang mga pulis, pareho nga naka-inom kag may daan na nga hiligut-anon ang mga suspect kag biktima.
Nakaagum sang mga pilas sa nagkalain-lain nga parte sang lawas ang mga biktima.
Nagapadayon ang imbestigasyon sang kapulisan sa lugar kag pagpangita sa suspetsado.
Tumandok sang nasambit nga barangay si Boy pero sa Barangay Poblacion siya nagapangalagad bilang tanod tungod didto nakapangasawa. — Aksyon Maria Kayla Tingzon
