ILOILO— Masobra P400,000 nga balor sang suspected shabu ang nakuha sa mag-iloy sa drug buy bust operation sa Brgy. Simon Ledesma, Jaro kaina sang kaagahon.
Subject si alyas Pane, 37-anyos kag nadakpan man ang iya iloy nga si alyas Welnie, 64-anyos nga lunsay residente sang Brgy. Simon Ledesma, Jaro.
Pulo ka dalagku nga sachet sang suspected shabu nga nagabug-at sang 70grams kag may standard drug price nga P476,000 ang nakuha sa operasyon.
Suno kay Police Captain Roque Gimeno III, head sang City Drug Enforcement Unit (CDEU), makapila ka beses nga nadakpan sa drug buy bust operation ang mga nangin live-in partner ni alyas Pane.
Sa balay nga ginatineran ni alyas Pane subong, nadakpan man sadto ang iya live-in partner nga si Juan. Sang napreso si Juan, ginbilin niya ang responsibilidad kay Pane nga mag-distribute sang illegal drugs.
Si Pane ang source sang shabu sa ila barangay, suno kay Gimeno. — Aksyon Farrah Mae Morano
