ILOILO CITY — 17 ka balay ang totally damaged kag lima ang partially damaged sa nagluntad nga sunog sa Brgy. Kasing-Kasing, Molo las 5:27 sang aga.
Ini base sa inisyal nga listahan nga gin-validate sang City Social Welfare and Development Office (CSWDO) kag mga barangay officials.
89 naman ka indibidwal ang apektado sa sunog.
Nag-evacuate sa Baluarte Elementary School ang mga biktima sang sunog.
Una na gin-ako sang residente nga si Ely Broñola nga sa kisame sang ila balay naghalin ang kalayo, kag madasig nga naglapta.
Nabudlayan pa ang mga bombero nga makasulod sa lugar tungod sang makitid nga dalan.
Naglab-ut sa malapit tunga sa milyon ka pesos nga balor sang kahalitan ang ginbilin sang sunog.
Suno kay Senior Fire Officer 1 Denmark Macoco, chief sang Intelligence and Investigation Unit sang Iloilo City Fire Station, base sa kalaparon sang lugar nga nasunogan P420,000 ang balor sang kahalitan.
Wala pa nalakip ang mga kagamitan nga nagkalasunog.– Aksyon Marvin Malificiar/Aksyon Farrah Mae Morano
