ILOILO — Nagatabok ang retired teacher sang nabungguan sang big bike nga ginamaneho sang senior citizen sa Barangay Rumbang, Pototan mga las-5 kahapon sang hapon.
Suno kay Police Major Dominic Parreño, chief of police sang Pototan Municipal Police Station, papuli na kuntani sa Ledesma Ward, Pototan ang retired teacher nga si alyas Roy, 54-anyos pero naghapit sa nagabaligya sang barbeques malapit sa Iloilo Provincial Hospital.
Nagtabok ang maestro agud magbakal sang pagkaon kag sang matabok siya liwat pabalik sa iya salakyan, nabungguan siya sang big bike nga ginamaneho ni alyas Nelson, 72-anyos nga taga-Jaro, Iloilo City.
Pakadto sa direksyon sang Iloilo City ang motorsiklo sang natabu ang aksidente.
Sa imbestigasyon sang kapulisan, madasig ang dalagan sang motorsiklo kag nagpang-alang-alang man sa pagtabok ang maestro.
Gindala pa ang nabungguan sa ospital pero gindeklarar nga dead-on-arrival.
Gin-refer naman sa ospital sa Iloilo City ang nakabunggo tungod napilasan sa tiil.
Naka-hospital arrest ang nakabunggo kag natalana pasakaan sang kaso nga reckless imprudence resulting to homicide. — Aksyon Maria Kayla Tingzon
