ILOILO CITY — Na-recover sa duha ka menor-de-edad ang binangon kag kutsilyo sang na-rescue sang mga barangay tanod sa North Baluarte, Molo pasado las-12 kaina sang kaagahon.
Naga-edad sang 16 kag 17 anyos ang duha.
Una nga nakabaton sang report si Punong Barangay Alan Aurelio nga may apat ka mga menor nga may bitbit nga malaba nga mga kutsilyo sang naglabay sa ‘Bungalon’ sa Zone 2.
Ginpakadtuan ni Aurelio sa mga tanod ang area kag naabtan ang mga menor nga bitbit ang binangon kag mga malaba nga kutsilyo.
Ginlagas sang mga tanod ang mga menor tubtob naglab-utanay sila sa gym sang barangay.
Nakapalagyo ang duha, samtang ang duha nagtaklas sa kudal sang gym. Samtang nagataklas ang duha, ginhandusan pa nila sang bitbit nga binangon kag kutsilyo ang tanod. suno sa kapitan.
Nawigit ang binangon kag kutsilyo sang nakataklas na sa kudal ang duha ka menor.
Ginpadayon sang mga tanod ang paglagas sa ila tubtob na-corner kag na-rescue.
“Na-recover ang suspected marijuana”
Gindala sa barangay hall ang gin-rescue nga mga menor kag ginrikisa.
Suno kay Aurelio, nakuha sa bulsa sang duha ang laya nga mga dahon nga ginapatihan nga marijuana.
Tungod sini, gin-turnover sa Molo police ang mga menor.
Sa pagpangusisa ni Aurelio, taga-Tanza Bonifacio kag Tanza Baybay, City Proper ang duha ka menor samtang taga-Tanza Timawa ang mga nakapalagyo. — Aksyon Marvin Malificiar
