“Bodegero” sang illegal nga druga nakuhaan sang P2 million nga balor sang suspected shabu sa Pavia

ILOILO — Naglab-ot sa P2 million nga balor sang suspected shabu ang nakumpiskar sa drug bust operation sa Barangay Pandac, Pavia kagab-i.

Subject sa operasyon ang ginatudlo bodegero nga si alyas Joel, 42-anyos nga taga-San Dionisio pero temporaryo nga nagatiner sa Ungka II, Pavia. Upod man niya nga nadakpan si alyas Agi, 26-anyos sang Bancal, Tigbauan.

Suno kay Police Major Marvin Villanueva, deputy chief sang Regional Police Drug Enforcement Unit 6 (RPDEU6), may ginatineran sa Pavia ang subject nga si Joel sa diin niya gina-stock ang illegal nga druga.

Nagtabuay lang ang police poseur-buyer kag ang subjects sa nakasugtan nga lugar gani indi sa iya ginatineran nga balay natabu ang transaksyon.

Nakuha sa subjects ang siyam ka sachets kag apat ka dalagku nga pinutos sang suspected shabu nga nagabug-at sang 320 gramos.

Naga-supply ang subjects sang illegal nga druga sa Pavia kag Iloilo City, suno sa pulis.

May gintuad na nga ngalan si Joel sang ila source nga iga-validate pa sang kapulisan. — Aksyon Maria Kayla Tingzon