ILOILO— Isa ang patay samtang isa ang pilason sa pagpangbuno sa guwa sang baylehan sa Brgy. PD Monforth North, Dumangas kaina sang kaagahon.

Suno kay Police Corporal John Rey Rubito, imbestigador sang Dumangas Municipal Police Station, may binayle kagab-i sa amo nga lugar tungod fiesta.

Sa imbestigasyon, nagpamayle ang mga biktima nga kanday alyas John, 21-anyos kag iya abyan nga si alyas Rom, 25-anyos nga lunsay residente sang amo man nga lugar.

Sang nagguwa sa baylehan ang duha, nagkitaay sila sang mga suspek nga kanday alyas Kumpol, 18-anyos kag alyas Ji, 23-anyos nga residente sang amo man nga lugar.

May nagluntad nga komosyon sa mga suspek kag biktima tubtob nga ginkuha ni Kumpol ang ginadala nga kutsilyo kag ginpangbuno ang biktima.

Ginalantaw sang pulis nga naka-inom ang mga suspek.

Gindala sa ospital ang duha ka mga biktima pero napatay si John samtang padayon pa nga ginabulong sa ospital si Rom.

Nag-surrender sa pulis si alyas Ji samtang padayon nga at large si Kumpol. — Aksyon Farrah Mae Morano