Masobra P3.6 million nga balor sang suspected shabu na-recover sa drug bust operation sa Estancia; anay maestro nga isa sa mga subject nakapalagyo

ILOILO— Naglab-ut naman sa 540 grams sang suspected shabu nga ginabanta nagabalor sang P3.6 million ang na-recover sa drug buy bust operation sa Brgy Poblacion Zone 1, Estancia.

Nadakpan kanday alyas Jojie, 43-anyos nga anay chief tanod; kag alyas Jess, 38-anyos nga lunsay residente sang Brgy Zone 1, Estancia.

Nakapalagyo naman si alyas Sir, anay maestro sang NISU Main Campus kag residente sang Zone 2, Estancia.

Suno kay Major Dadje Delima, head sang Provincial Drug Enforcement Unit (PDEU), subject sang operasyon kanday Jojie kag Sir samtang upod lang nila si Jess.

Na-adik sa Illegal nga druga ang maestro kag nag-untat sa pagtudlo. Ginpetisyunan naman nga pahalinon ang anay tanod, suno kay Delima.

Sa impormasyon sang PDEU, sa fourth kag fifth district sang Iloilo naga-operate sa pagbaligya sang illegal drugs ang tatlo.

Sa guwa Western Visayas nagahalin ang supply sang illegal nga druga sang tatlo. — Aksyon Farrah Mae Morano