ILOILO — Nalipong kag nakaagum sang gasgas sa guya kag pila ka parte sang lawas ang 23-anyos nga board passer nga babaye sang nadisgrasya sa ginamaneho nga motorsiklo sa Brgy Sarapan, Passi City kaina sang kaagahon.
Suno kay FO1 Jerick John Casamayor sang BFP Passi City nga nagresponder sa aksidente, nakabaton sila sang impormasyon halin sa concerned citizen nga nakalabay sa area nga may nagakulob kag lipong nga babaye kag ginpahayag nagapanimaho sang makahulubog nga ilimnon.
Sa pagpangusisa sang bombero sa biktima nga si alyas Van, gin-ako niya nga nag-inum inom siya sa Brgy, Aglalana, upod sa iya mga abyan agud iselebrar ang pagpasar niya sa board examination.
Tungod sa kahulugbon, wala na siya nakahibalo nga naglapaw ang iya pagmaneho tubtob nga natumba kag nalipong. Wala sang suksok nga helmet si Van suno kay FO1 Casamayor.
Gindala sa Don Valerio Memorial District Hospital ang biktima kag gin-discharge man gilayon sa ospital.
