ILOILO CITY — Bisan naga-ulan sang nagluntad ang sunog sa Barangay Democracia, Jaro las-12:15 kaina sang kaagahon, ang mamadlos nga hangin ang nagpadasig sang paglapta sang kalayo.
Suno kay FO1 Joffrey Alsado, imbestigador sang Iloilo City Fire Station, duha ka mga balay ang totally damaged samtang isa ang partially damaged.
Human sa mixed materials ang mga balay nga nasunog.
Nangin pagpanghangkat man sa pagresponde sang mga bumbero ang makitid nga dalan pasulod sa mga pamalay.
Sa pagpangusisa sang mga bumbero sa pamilya Acosta, naga-estar sa balay diin nagsugod ang kalayo, yara sila sa sala nga nagahigda sang nanotisyaran nga may naga-aso halin sa kwarto.
Pagbukas sang kwarto, nagapuog na ang aso gani nagguwa na sila.
Wala sang tawo sa amo nga kwarto tungod may ginkadtuan ang bata sang tagbalay.
Nagkuha na sang wire kag debris samples ang personnel sang BFP Iloilo City agud mapadala sa ila headquarters para sa dugang nga imbestigasyon sa pagtumod sang ginsuguran sang kalayo.
Naglab-ot sa P98,000 ang ginbilin nga kahalitan sang sunog.
Gindeklarar fire out la-1:13 sang kaagahon.
