ILOILO CITY – Wala sang lugar sa mga komunidad ang mga indibidwal nga naglapas sa laye ukon nakakomiter sang krimen.
Ini ang ginapangabuhi adlaw-adlaw sang kapulisan sang Iloilo City Police Office agud mapabilin nga safe kag malinong ang syudad batuk sa kriminalidad.
Humalin sang Hulyo 1 tubtob 31, naaresto sang ICPO ang 70 ka mga pugante ukon wanted persons sa mga ginhimo nga law enforcement operations.
Sa datos sang ICPO, 15 ang mga naaresto nga Most Wanted Persons kag 55 ang Other Wanted Persons nga nagapakita sang dedikasyon sang mga pulis sa syudad. Mas mataas man ini nga datos kumparar sang Hunyo.
May pinakadamo nga naaresto ang Police Station 2 sa La Paz, ginsundan sang Iloilo City Mobile Force Company kag Police Station 6 sa Arevalo.
Nagapasalig ang ICPO nga mas mabaskog kag masangkad ang himuon nga mga operasyon agud matapna ang krimen sa mga komunidad.
