Ginkumpirmar sang tagdumalahan sang San Nicolas de Tolentino church sa Guimbal nga gin-vandal paagi sa paglampos sang bato ang antigo nga imahen sang San Jose sa atubang sang simbahan.
Sa Facebook post sang simbahan, wala pa makilala ang naghimo sini.
Nabali ang kamot sang imahen.
“Diri sa aton Parokya, ini nga mga imahen indi lanang simple nga kahoy kag pintura; ini ang mga balaan nga simbolo sang aton pagtuo kag isa ka hamili nga handumanan sang aton mga katigulangan nga nagpatindog sang sini nga parokya. Indi lang ini daku nga kagub-anan sa aton simbahan kundi isa man ka pagpakita sing walay pagtahod sa aton pinasahi nga espirituhanon kag kultural nga panubion,” ang post sang Parokya.
Nagapangabay ang Parokya sa tumuluo nga “mangin mas mainandamon, may respeto, kag mapinanumdumon sa mga aksyon.”
Nagapangabay man ang Parokya sa tanan nga magbulig agud amligan ang simbahan kag mga imahen, kag making-angut sa Parish Office kon may ihibalo sa may kahimuan sang pagpangguba.
