Napilasan sa ulo kag liug ang 33-anyos nga magulang sang ginlabu sang binangon sang iya manghod samtang may pilas man sa ulo ang manghod sang ginbuno sang buka nga botelya sang iya magulang sa Brgy.Magdungao Passi City.
Lunsay lalaki ang mag-utod nga residente sang amo nga barangay.
Base sa imbestigasyon sang Passi City police, nag-inum inom sang makahulubog nga ilimnon ang mag-utod sa ila balay upod ang ila mga abyan. May wala pag-intsindihanay nga natabo nga rason sang pagbinaisay tubtob nagkinagamo.
Wala matumod ang ginbaisan sang mag-utod pero ginatudlo ang kahulugbon sang duha.
Ginbulong ang mag-utod kag nagsumiter sang affidavit of non-interest, buot silingon indi na magpasaka sang kaso sa isa kag isa.
Tungod sa natabo, nagaplano ang manghod nga magpauli sa Antique agud malikawan ang gamo sa tunga sang iya magulang.
