ILOILO — Wasak ang ulo sang nasapwan ang senior citizen sa Barangay 3 (Poblacion), Igbaras, Iloilo pasado las- 12 kaina sang kaagon.
Suno kay Police Captain Francis Doanne Lomahan, hepe sang Igbaras Municipal Police Station, ginlampusan sa ulo sang kasubong niya man nga senior citizen ang biktima.
Base sa imbestigasyon sang pulis, nagadayon lang sa payag nga ginatiniran man sang biktima nga si alyas Caloy ang suspek nga si alyas Dado.
Ginapahalin na sang biktima ang suspek humalin pa sang nagligad mga semana sa ila ginatiniran.
Suno kay Lomahan ang biktima temporaryo lang man nga naga-istar sa amo nga payag tungod handler siya sang mga manok sang tag-iya sang payag.
Ang suspek naman ang “homeless” suno kay Lomahan kag nagdayon lang amo nga payag.
Posible nga naakig ang suspek tungod ginapahalin na siya sang biktima gani nalumpsan niya sang bara de cabra.
Sa subong, arestado na sang pulis ang suspek kag ginapreparar na ang kaso nga murder.
