GUIMARAS – Palaligban sa mga residente sang Sitio Cuta, Brgy. Ayangan, Sibunag kon sin-o ang sa likod sang pagpatay sa baka nga nasapwan nga wala na sang ulo kag apat ka tiil.
Ang baka ginapanag-iyahan ni Barangay Kagawad Jose Maria Segovia.
Suno kay Police Lieutenant Almie Enriquez, hepe sang Sibunag Municipal Police Station, ginlawig ang baka malapit 50 metros ang distansiya halin sa balay sang tag-iya.
Oktubre 7 sang gab-i, nabatian pa sang tag-iya ang lahay kag taghol sang mga ido pero iya ginbalewala tungod nga naga-ulan.
Kahapon las 5 sa kaagahon, Oktubre 8, nakit-an ni alyas Vincent ang baka sang madul-ong siya sang iya asawa pakadto sa banwa.
Ginkuhaan niya ini sang picture kag ginpadala sa ila messenger sang barangay gani nakalab-ut sa tag-iya.
Posible suno sa pulis nga sa higad sang karsada na lang gin-ihaw sang mga suspek ang baka.
Padayon nga gina-imbestigaran sang mga pulis ang insidente.
