ILOILO — Dead-on-arrival sa ospital ang 27-anyos nga babaye nga driver sang motorsiklo sang nakabunggo sa naga-park nga fuel tanker sa Barangay San Jose, San Miguel las-4 kaina sang kaagahon.
Suno kay Police Major Bryan Alejo, hepe sang San Miguel Municipal Police Station, halin sa Iloilo City ang driver sang motorsiklo nga si alyas Den-den kag papuli na halin sa night shift duty sang natabo ang aksidente.
Nagguwa sa imbestigasyon nga madasig ang padalagan sang driver tubtob nakabunggo sa fuel tanker nga naga-park sa kilid sang karsada.
Nagapangape ang driver kag pahinante sang truck kag nakita ang natabo.
May suksok nga helmet ang driver pero tungod sa impact napatay siya.
Wasak ang motorsiklo samtang nagupi ang likod sang fuel tanker.
Yara sa kustodiya sang pulis ang driver sang fuel tanker.
