ILOILO — Pilas sa ulo kag dulunggan ang naagum sang senior citizen sang ginlabo sang espading sang pangayaw sa Brgy. Gemumua Agahon, Passi City las 7 kagab-i.
Ginkilala ang biktima kay alyas Criselda, 60-anyos kag residente sang amo nga lugar kag suspect si alyas Leonel, 18 anyos nga taga-Lambunao.
Suno kay Brgy. Kagawad Harold Gabais, nakabaton sila sang tawag kagab-i gani ginrespondehan.
Sa pagpangusisa, nagba-isay ang biktima kag ang suspek nga lunsay naka-inom sang makahulubog nga ilimnon tubtob ginlabo sang suspect sang espading ang biktima.
Indi pa matumod kon magka-upod nga naga-inom ang suspect kag biktima suno kay Kagawad Gabais.
Sang ginpamangkot ni Kagawad Gabais ang suspect, gin-ako niya nga wala siya nakahibalo sang natabo tungod nga nakainom.
Padayon nga ginabulong sa ospital ang biktima, samtang yara sa kustodiya sang Passi City police ang suspect.
Ginpahayag ni Kagawad Gabais nga pangayaw ang suspek sa barangay kag isa pa lang ka bulan nga naga-ubra bilang all-around boy sa isa ka balay.
