Manila — Indi na madayon ang Aliwan Fiesta 2026 nga natalana kuntani sa Mayo 7 tubtob 9, suno sa MBC Media Group.
Ginpahayag ni Ms. Ellen C. Fullido, VP – Human Resources and Admin Services sang MBC- Media Group nga madamo sang mga participants ang nag-backout sa Aliwan Fiesta tungod sa kakulang sang budget kag apektado sang krisis sa Middle East.
Lima lang suno sa iya, ang nagkumpirmar nga mapasakop sa kumpetisyon.
Bisan ang Sinamba sa Regatta sang Paraw Regatta Festival kag Tultugan Festival sang Kasadyahan sa Kabanwahanan nga gin-imbitar sang MBC- Group, wala man nagkumpirmar nga mapasakop.
Antes gin-anunsyar ang kanselasyon, ginpahibalo na suno kay Ms. Fullido, ang mga local government units nga indi madayon ang Aliwan Fiesta subong nga tuig.
Ini na ang ikaduha nga tuig nga wala sang Aliwan Fiesta tungod ginkanselar man ini sang nagligad nga tuig tungod sa midterm elections.
