ILOILO — Nakuhaan sang masobra P100,000 nga balor sang suspected shabu ang anay barangay kagawad sang Ubang, Pototan sang gin-subject sa drug bust operation las-11 kahapon sang aga.
Ginkilala ang subject kay Chrisdeo Enojo, 50-anyos nga residente sang amo nga barangay.
Na-recover sa operasyon ang pito ka sachets sang suspected shabu nga ginabanta nagabug-at 20 grams.
Suno kay Police Major Dominick Parreño, hepe sang Pototan Municipal Police Station, si Enojo ang pinakauna nga barangay official sa banwa nga nag-surrender sa tion sang War on Drugs ni former President Rodrigo Duterte.
Nagpalab-ot sang impormasyon ang mga residente nga may panagupnop sila nga nagabaligya sang illegal nga druga si Enojo gani gin-monitor sang kapulisan. — Aksyon Maria Kayla Tingzon
