Ginkakibot sang pamilya nga naga-inukay na ang ila mga gamit sa gina-okupar nga unit sang apartment sa Brgy. Calubihan, Jaro kagab-i, Agosto 9.
Nagpauli ang magpamilya sa Badiangan sang weekend kag natukiban nga ginkawatan ang ila unit pagbalik nila kaina sang hapon. Kada weekend nagapauli sa uma ang magpamilya.
Sa pagpangusisa sang Aksyon Radyo Iloilo news team, las-5:00 kaina sang kaagahon sang ginsulod sang suspek ang unit. Gina-okupar sang magpamilya ang unit sa ground floor nga may mezzanine floor.
Nag-agi sa bintana sa mezzanine floor ang suspek.
Gingisi sang suspek ang screen kag isa-isa nga ginhukas ang mga jalousie sa bintana gani nakasulod.
Nadula sa sulod sang kwarto sang bata ang mga alahas. Wala naka-lock ang kuwarto sang bata.
Sunod nga ginkuha sang suspek ang helmet kag liyabe sang motorsiklo sang isa pa ka bata sang nagarenta sa unit.
Nagpanaug kag nagpang-ukay man sa sala sang unit ang suspek.
Antes pa sini, gintinguhaan pa sang suspek nga maliso paibabaw ang CCTV camera sa sala pero makit-an sa gihapon ang iya hitsura.
Ginpahayag sang nagarenta sa unit nga posible nag-inum pa ang suspek tungod sa nabilin nga container sang fruit juice.
Nakit-an sa sulod sang kwarto sang bata nga babaye ang kutsilyo nga ginalantaw sang pamilya nga gamiton kuntani agud ilukit sa lock sang puwertahan para masulod ang kwarto sang mag-asawa pero napaslawan siya. — Aksyon Paula Elambayo
