Appliance store sa Barotac Viejo ginransak; 34 ka cellphones nataban

ILOILO –Ginransak kag nakuha ang 34 ka nagkalain-lain nga brands sang cellphone sa Imperial Appliance sa Poblacion, Barotac Vieojo.

Suno kay Police Captain Frances Batallones, Officer-in-Charge sang Barotac Viejo Municipal Police Station, las-8 kaina sang aga sang nadiskubrehan sang empleyado nga guba na ang padlock sang roll up door kag naga-alsa na.

Ginguba man ang lock sa idalum sang crystal nga pwertahan nga gin-agyan sang suspek.

Base sa Closed-Circuit Television (CCTV) camera nga nakuha sang pulis isa lang ka lalaki ang nakita nga nagsulod sa establisyimento.

Nagapadayon pa ang inventory sang management sang Imperial rason nga wala pa nahibaluan sang pulis ang balor sang mga nakuha nga cellphones.

Samtang, gina-check pa sang pulis ang iban nga CCTV camera agud mahibaluan kon may iban pa nga upod ang suspek. — Aksyon Angel Mae Ciudad