ILOILO — Na-rescue sang mga katapo sang Bureau of Fire Protection (BFP) Pavia ang tatlo ka sakay sang awto nga naanod sang naglabay sa overflow nga malapit sa Mali-ao creek sa boundary sang Amparo kag Pal-agon.

Una nga na-rescue ang driver sang salakyan. Sunod nga na-rescue ang sakay nga mag-asawa.

Sa impormasyon nga nakuha sang Aksyon Radyo Iloilo news team, driver sang Grab car ang una nga na-rescue kag pasahero niya ang mag-asawa nga halin sa airport kag mapauli kuntani sa Monticello Subdivision.

Apang gintuyo sang driver nga maglabay sa nag-overflow sa Mali-ao Creek, pero gin-anod sang mabaskog nga daludo sang tubig.

Gindala sa ospital sa siyudad sang Iloilo ang mga sakay sang awto kag yara na sa estable nga kondisyon.

Mga pasado las-6 subong nga aga sang gin-anod ang salakyan tungod sa bulyada sang tubig nga halin sa mga kaumhan sa Sta. Barbara.

Sa inisyal nga impormasyon halin sa Pavia Municipal Disaster Risk Reduction and Management Office (MDRRMO), mabuslog pa Aganan river ang tubig. — Aksyon Marvin Malificiar