Awto nagtakilid sang nakabunggo sa poste sang street light sa Santa Barbara

ILOILO —Pilason ang driver sang awto sang nakabunggo sa poste sang streetlight sa Brgy. Bolong Oeste, Sta. Barbara sang Agosto 25 sang kaagahon.

Suno kay Police Staff Sergeant Ian Sumagaysay, imbestigador sang Sta. Barbara Municipal Police Station, halin sa Pavia ang awto nga ginamaneho sang 21-anyos nga lalaki kag mapauli kun tani sa Cabatuan sang nadulaan sang kontrol sa manibela.

Tungod sini, nakabunggo ang awto sa poste sang street light kag nagtakilid pa-wala ang salakyan, suno sa police.

Ginpahayag sang police nga nakaagum sang minor injury ang driver kag nagreklamo sang pagpalanakit sang iya nga lawas.

Nawasak naman ang unahan nga porsyon sang awto. —via Francisco Enar