Awto nga na-anod sang naglabay sa overflow bridge sa Mali-ao Creek sa Pavia nakit-an na; Mga bagahe sang mag-asawa nga pasahero na-recover

ILOILO — Ginabanta sa 200 metros ang kalayuon sa diin na-recover ang awto nga gin-anod sang baha halin sa overflow bridge sang Mali-ao Creek sa Pavia sang Hulyo 24 sang kaagahon

Suno kay Mr. Reagin Jardio sang Iloilo Provincial Disaster Risk Reduction and Management Office, nagnubo na ang lebel sang tubig sa creek gani nga madasig nakit-an ang awto.

Nagakaya ang awto sang na-recover sang mga rescuers kag ginbutong agud mapasaka halin sa creek.

Una na nga gin-report nga sakay sa awto nga nagaserbe Grab car ang mag-asawa nga halin sa Metro Manila kag nagpauli lang sa Iloilo agud magbakasyon. Halin sa Iloilo International Airport kag padulong sila sa Monticello Subdivision sang naglabay ang awto sa overflow bridge.

Mabaskog ang daludo sang tubig pero nagpamilit ang Grab car driver nga maglabay sa overflow bridge gani nga naanod. Pareho nga naluwas ang mga sakay lakip ang driver sang awto.

Ginkumpirmar ni Jardio nga na-recover sa compartment sang awto ang mga gamit sang mag-asawa. Gilayon man ang mga ini nga ginturn-over sa pamilya sang mag-asawa.